Rundunar ‘yan sanda a jihar Zamfara ta karfafawa matasa masu yi wa kasa hidima a jihar guiwa cewa za ta tabbatar tsaron lafiyar su.

Wannan tabbaci ya zo ne bayan sace wasu daga matasan yayin da su ke kan hanyar tafiya sansanin horar da su makamar aikin hidimar a Tsafe.

Kwamishinan ‘yan sanda na jihar Ayuba Elkana ya ziyarci sansanin horarwar inda ya tabbatarwa matasan matakan da a ke dauka don kare su daga barayin mutane.

Yanzu dai rundunar ta ce ta tura jami’ai don ceto matasan da a ka sace da sauran wadanda akasin ya rutsa da su.

In za a tuna dai an dawo da sadarwar wayar salula a babban birnin jihar Gusau da hakan ya farfado da hada-hada da walwalar al’umma.

Jihar Zamfara na daga mafi tsanantar fama da barayin daji da kan sace da karbar kudin fansa.

Jami’an tsaro sun kaddamar da yaki da miyagun irin da su ka addabi akasarin yankin arewa maso yammacin Najeriya da kuma jihar Neja a arewa ta tsakiya.

Share this...

Facebook

email