Jihar Zamfara ta bi sahun jihar Kaduna wajen shirin dawo da sadarwar salula a litinin din nan.
Tuni jihar Kaduna ta dawo da sadarwar inda ta bar sauran dokoki na hana hawa babur da saida man fetur a jarka.
Zamfara ta rufe sadarwar waya tun watan satumba don shirin da jami’an tsaro su ka yi na yi wa barayin daji kofar rago.
Rufe sadarwar ta sanya jama’a shiga damuwa don rashin tasiri na zahiri kan barayin da su ka cigaba da miyagun laifuka.
Dama gwamnatin jihar ta dawo da sadarwar a babban birnin jihar Gusau da ya jawo farin ciki ainun a tsakanin ma’abota waya.
Alamu na nuna tasirin rufe sadarwar ba shi da yawa kan lamuran tsaro don a yankin Sabon Birni da Isa a jihar Sokoto an baiyana cewa barayin kan yi amfani da layin sadarwar Nijar.

Share this...

Facebook

email