Hukumomin tashoshin teku na wasu kasashen Afurka ta yamma sun daura haramar yaki da barayin teku da ke barazana ga lamuran kasuwancin teku a yankin.

Damuwar ta shafi yanda a kan samu barayin teku musmman a mashigar teku ta Gunea.

A ziyarar hadin guiwar kasuwancin teku, tawagar hukumar kasuwancin teku ta Ghana ta zo Abuja inda ta gana da hukumar sufurin jiragen ruwa ta Najeriya don daukar karin matakan cin riba 100% daga kasuwancin teku.

“fashi a mashigar tekun Gunea babban kalubale ne, mu a Ghana zan iya cewa mu na da salama a sufuri ta tekun mu, amma in gemun dan makwabcin ka ya kama da wuta sai ka shafawa na ka ruwa” inji shugabar hukumar kasuwanci ta teku ta Ghana Mrs. Benonita Bismack. 

Ta cigaba da cewa su na aiki tare da makwabta da jami’an tsaro don tabbatar da tsaron teku a yankin, amma abun takaici mun ji labarin cewa an kai wa wasu jirage hari da sace wasu ‘yan kaashen ketare.”

A jawabin sa, shugaban hukumar kasuwanci ta jiragen ruwa na Najeriya Mallam Hassan Bello ya ba da tabbacin ingancin matakan da a ka dauka na yaki da ‘yan fashin.

Hassan Bello ya koka ga yanda a ke samun jinkirin fiton kaya a tashar teku ta Najeriya amma ya ce hukumar sa ta bullo da wata dabara.

Najeriya na da tasiri wajen lamuran kasuwanci a yankin Afurka ta yamma da kan sa duk matakan da ta kan dauka na dakatar da shigo da wasu hajoji kan shafi sauran kasashe da ke makwabtaka har ya kai ga amfani da hanyoyin diflomasiyya wajen daidaita lamura.

Masana tattalin arziki na cewa dogara da Najeriya ke yi wajen shigo da duk muhimman kayan da ta ke bukata daga ketare ciki kuwa har da man fetur na kawo kuncin tattalin arziki da tsadar kayan masarufi.

Share this...

Facebook

email